ܡܫܘܚܐ ܘܦܝܠܣܘܦܐ ܩܕ݇ܡܝܐ ܕܐܬܘܪ̈ܝܐ
ܒܝܢܬ݂ 154 ـ 222 ܡ
ܒܪܕܝܨܢ ܗܘܐܠܗ ܒܡܕܝܢ݇ܬܐ ܕܐܘܪܗܝ، ܘܡ̣ܢ ܒܬ݇ܪ ܗܕܐ ܟܕ ܟܡܝܠܐ ܒܚܕ݇ ܝܘܠܦܢܐ ܥܠܝܐ ܩܡ ܗܘܐܠܗ ܚܕ݇ ܝܣܘܪܐ ܕܪܚܡܘܬܐ ܐܘܦ ܥܡ ܚܕ݇ܟܡܐ ܡ̣ܢ ܐܡܦܪܛܘܪ̈ܐ ܕܪܗ݇ܘܡܝ̈ܐ.
ܒܪܕܝܨܢ ܓܘ ܡܬܚܐ ܕܚܝܘܬܗ ܟܬܝܒ݂ܠܗ ܟ̰ܡ ܪܒܐ ܥܘܢܝܬ̈ܐ ܕܙܡܪ̈ܝܬܐ ܒܩܠ̈ܐ ܦܪ̈ܝܫܐ، ܡܐܡܪ̈ܐ ܫܪ̈ܝܐ ܓܕܝܠ̈ܐ، ܗ.ܕ. ܫܥܪ̈ܐ، ܘܟܬܝܒ݂ܠܗ ܚܕ݇ ܟܬܒ݂ܐ ܒܕܘܪܫܐ ܕܪܩܘܒ݂ܠ ܕܚܕ݇ ܚܪܫܐ ܐܣܪܢܐ ܕܚܝ̈ܐ ܒܚܠܩܐ ܘܒܟܘܟ݂ܒ݂̈ܐ ܫܡܗ ܐܒ݂ܝܕܐ ܘܡܘܩܪܒ݂ܠܗ ܠܐܗܐ ܣܝܡܗ ܩܐ ܟܪܟܠܐ ܐܡܦܪܛܘܪ ܕܪ̈ܗܘܡܝܐ ܐܗܐ ܟܬܒ݂ܐ ܟܐ ܦܐܫ ܗ݇ܘܐ ܩܪܝܐ ܥܠ ܚܠܩܐ ܝܢ ܢܡܘܣ̈ܐ ܫܬܐܣܝ̈ܐ ܕܐܬܪ̈ܘܬܐ. ܐܘܣܒ݂ܝܘܣ ܒܡܟܬ݂ܒ݂ܐܢܘܬ ܕܙܒ݂ܢܐ (ܬܫܥܝܬܐ) ܕܡܫܝܚܝܘܬܐ، ܒܐܡܪܐ ܝܠܗ ܕܒܪܕܝܨܢ ܪܒܐ ܥܠܝܐ ܝܗ݇ܘܐ ܒܠܫܢ̈ܐ ܦܪ̈ܝܫܐ ܕܐܬܘܪ̈ܝܐ ܘܕܝܘܢܝ̈ܐ، ܘܒܐܢ̈ܐ ܠܫܢ̈ܐ ܟܬܝܒ݂ܠܗ ܟ̰ܡ ܪܒܐ ܡܐܡܪ̈ܐ، ܡܡܠܠ̈ܐ ܘܡܘܫܚܬ̈ܐ ܘܟܬܒ݂̈ܐ ܥܠ ܐܣܛܪܘܢܘܡܝܐ ܘܥܠ ܐܣܛܘܟ݂ܣ̈ܐ ܕܟܝܢܐ ܘܕܒܢܝܢܫܐ. ܒܫܘܪܝܐ ܒܪܕܝܨܢ ܬܒܝܥܐ ܗ݇ܘܐ ܠܝܘܠܦܢܐ ܕܓܢܘܣܛܝܩܝ ܘܠܡܠܦܬܐ ܕܘܠܢܛܝܢܘܣ ܘܟܐ ܡܠܦ ܗܘܐ ܕܓܘ ܬܒ݂ܝܠ ܐܝܬ ܬܠܬ݇ܐ ܟܝܢ̈ܐ ܦܪ̈ܝܫܐ، ܘܐܪܒܥܐ ܐܝܬܝ̈ܐ، ܝܥܢܐ ܗܘܢܐ، ܚܝܠܐ، ܦܪܡܝܬܐ، ܝܕܥܬܐ، ܘܐܪܒܥܐ ܚܝܠ̈ܐ ܗ.ܕ. ܢܘܪܐ، ܡܝܐ، ܒܗܪܐ ܘܪܘܚܐ. ܘܡ̣ܢ ܕܐܢ̈ܐ ܚܝܠ̈ܐ ܒܐܬܝܐ ܝܢܐ ܠܐܝܬܘܬܐ 360 ܣܛܘܟ݂ܣ̈ܐ ܕܓܘܫܡ̈ܐ ܕܒܦܝܫܐ ܝܢܐ ܚܙܝ̈ܐ ܓܘ ܥܠܡܐ. ܒܪܕܝܨܢ ܟܐ ܣܪܒ݂ ܗ݇ܘܐ ܠܩܝܡܬܐ ܕܡܝܬ̈ܐ ܒܦܓܼܪܐ ܘܟܐ ܐܡܪ ܗ݇ܘܐ ܕܫܪܓ݂ܐ ܕܠܐ ܡܫܚܐ ܠܐ ܡܨܝܐ ܠܗܝܐ، ܐܝܢܐ ܟܐ ܡܟܫܛ ܗܘܐ ܠܓܒ݂ܪܐ ܘܠܡܙܝܕܬܐ ܕܓܢܣܐ، ܟܕ ܒܚܙܝܐ ܠܪܘܚܐ ܠܐ ܡܝܘܬܬܐ ܕܚܕ݇ ܐ݇ܢܫܐ ܐܚܟ̰ܝ ܓܘ ܝܘܠܦܢܹܐ ܝܠܗ، ܐܝܡܢ ܕܡܦܠܚܠܗ ܠܛܒ݂ܬܐ ܕܥܠܡܐ.
ܒܗ̇ܘ ܙܒ݂ܢܐ ܕܫܘܠܛܢܐ ܐܬܘܪܝܐ ܒܐܘܪܗܝ، ܒܟܠ ܚܕܐ ܕܘܟܐ ܒܫܗܪ̈ܘܬܐ، ܒܥܐܕܘܬ̈ܐ، ܒܚܠܘܠܢ̈ܐ ܐܬܘܪ̈ܝܐ ܟܐ ܙܡܪ̈ܝ ܗܘܘ ܘܟܐ ܪ̈ܩܕܝ ܗܘܘ ܒܙܡܪ̈ܝܬܐ ܘܒܩܠ̈ܐ ܕܦܝܠܣܘܦܐ ܒܪܕܝܨܢ. ܘܒܪܕܝܨܢܟܐ ܬܚܢ ܗܘܐ ܘܟܐ ܦܠܚ ܗܘܐ، ܘܥܠܡܐ ܐܬܘܪܝܐ ܟܕ ܒܚܝܐ ܒܫܘܕܐ، ܒܚܝܠܐ ܘܒܚܕܘܬܐ ܓܘ ܛܒ݂ܬܐ، ܟܕ ܒܪܚܩܐ ܡ̣ܢ ܟܠ ܚܕܐ ܚܛܝܬܐ ܘܥܘܠܐ.
ܐܝܢܐ ܒܪܕܝܨܢ ܚܪܒ݂ܐ ܕܐܬܘܪ̈ܝܐ ܒܚܙܝܘܗܝ ܗܘܐ ܐܚܟ̰ܝ ܓܘ ܠܫܢܐ ܦܝܫܐ ܩܪܝܐ ܐܪܡܝܐ، ܘܒܟܬܒ݂ܐ ܗܘܐ ܕܠܫܢܐ ܐܬܘܪܝܐ، ܠܫܢܐ ܕܚܝܘܬܐ ܝܠܗ ܘܠܫܢܐ ܐܪܡܝܐ ܠܫܢܐ ܕܬܫܡܫܬܐ ܝܠܗ، ܘܐܢ̈ܐ ܪ̈ܘܚܢܝܐ ܕܕܝܢ ܗܕܘܪܐ ܝܢܐ ܡܘܬܐ ܩܐ ܐܬܘܪ̈ܝܐ، ܩܐ ܕܫܡܫܝܠܗ݇ܘܢ ܘܛܡܪܝܠܗ݇ܘܢ، ܘܗܪ ܠܐܗܐ ܥܠܬܐ ܟܬܝܒ݂ܠܗ ܚܕܐ ܡܫܘܚܬܐ : ܕܠܐ ܟܝܠܬܐ ܕܝܘܪܟ݂ܐ، ܠܐ ܢܦܘܠܘܢ ܠܐܘܪܚܐ.
ܡܪܝ ܐܦܪܝܡ، ܟܬܝܒ݂ܠܗ ܪܒܐ ܕܪܩܘܒ݂ܠ ܕܝܘܠܦܢܐ ܕܒܪܕܝܨܢ، ܐܝܢܐ ܬܠܡܝܕ̈ܐ ܕܒܪܕܝܨܢ، ܢܛܪܗ݇ܘܢ ܠܣܝܡ̈ܐ ܕܪܒܝܝܗܝ. ܚܕ݇ܟܡܐ ܡ̣ܢ ܟܬܒ݂ܘܗܝ ܦܝܫܠܗ݇ܘܢ ܦܘܫܩ̈ܐ ܠܠܫܢܐ ܝܘܢܝܐ. ܐܘܦ ܗܪܡܘܢ ܒܪܘܢܐ ܕܒܪܕܝܨܢ، ܪ݇ܚܫܠܗ ܒܫܘܦܦ̈ܐ ܕܒܒܗ، ܐܝܢܐ ܡܘܕܝ ܟܬܝܒ݂ܠܗ؟ ܠܐ ܝܠܗ̇ ܦܝܫܬܐ ܝܕܝܥܬܐ. ܡ̣ܢ ܟܬܒ݂̈ܐ ܕܒܪܕܝܨܢ ܒܦܝܫܐ ܝܢܐ ܒܒܝܬܐܪ̈ܟܐ ܕܒܪܬܝܢ، ܐܚܟ̰ܝ ܚܕ݇ܟܡܐ ܡ̣ܢ ܟܬܒ݂ܘܗܝ ܘܟܬܒ݂ܐ ܕܥܠ ܚܠܩܐ ܘܚܕ݇ܟܡܐ ܡ̣ܢ ܥܘܢܝܬ̈ܗ ܒܦܝܫܐ ܝܢܐ ܢܛܝܪ̈ܐ، ܐܘܦ ܒܡܐܡܪ̈ܐ ܕܡܪܝ ܐܦܪܝܡ ܕܟܐ ܦܐܫ ܩܪܝܐ ܢܒ݂ܝܐ ܐܬܘܪܝܐ.
ܐܝܢܐܒܟܠܗ ܕܐܗܐ ܕܪܩܘܒ݂ܠܝܘܬܐ ܥܠ ܒܪܕܝܨܢ، ܟܠܝܗܝ ܡܫܘܚ̈ܐ ܕܐܬܘܪ̈ܝܐ ܐܝܟܼ ܡܪܝ ܐܦܪܝܡ، ܡܪܝ ܢܪܣܝ ܟܢܪܐ ܕܪܘܚܐ، ܡܪܝ ܐܣܚܩ ܕܐܢܛܝܘܟ݂ܝ ܘܫܪܟܐ ܟܐ ܟܬܒ݂ܝ ܗ݇ܘܘ ܡܘܫܚܬ̈ܐ ܐܚܟ̰ܝ ܒܦܨܠ̈ܐ ܕܡܘܫܚܬ̈ܐ ܕܒܪܕܝܨܢ. ܘܐܗܐ ܟܬܒ݂ܐ ܦܝܠܣܘܦܐ، ܬܪܘܨܐܝܬ ܡܫܘܚܐ ܘܦܝܠܣܘܦܐ ܩܕ݇ܡܝܐ ܕܐܬܘܪ̈ܝܐ ܝܠܗ ܕܐ݇ܚܪܬܐ ܒܐܦܣܩܘܦܐ ܗܘܣܛܦܐ ܕܐܘܪܗܝ ܦܝܫܠܗ ܡܘܬܒ݂ܐ ܠܗܝܡܢܘܬܐ ܕܥܕܬܐ ܡܫܝܚܝܬܐ.
ܒܚܘܦܛܐ: ܘܠܝܡ ܦܐܪܘܝܐܢ
ܣܝܥܬܐ ܣܦܪܝܬܐ ܕܥܠܝܡ̈ܐ ܐܬܘܪ̈ܝܐ
ܐܝܪܢ 2007 ܡ