ܡܐܙܠܬܐ ܬܫܥܝܬܢܝܬܐ ܕܫܘܬܐܣ̈ܢ ܦܘܠܝܛܝܩܝ̈ܐ ܠܐ ܝܠܗ̇ ܚܕܐ ܡܐܙܠܬܐ ܡܣܝܡܢܬܐ ܓܘ ܚܩܠܐ ܕܫܘܘܫܛܐ ܘܡܬܛܘܪܢܘܬܐ ܦܘܠܝܛܝܩܝܬܐ ܕܣܘܟܠܐ ܥܠܡܝܐ ܕܫܘܬܐܣ̈ܐ ܘܛܘܟܣ̈ܐ ܟܢܫܝ̈ܐ. ܛܟܼܣ̈ܐ ܕܓܒ̈ܢ ܘܫܘܬܐܣ̈ܢ ܒܢܝܐ ܝܠܝܗܝ ܥܠ ܫܒܼܝܠ̈ܐ ܘܐܣ̈ܐ ܢܘܪ̈ܝܐ (ܗܪ̈ܡܝܐ) ܪܚܩܐ ܡ̣ܢ ܚܒܼܝܫܘܬܐ ܕܡܦܠܚܬܐ ܕܣܘܥܪܢܐ ܕܝܡܘܩܪܛܝܐ ܡܛܠ ܕܐܢܝ ܠܐ ܝܠܝܗܝ ܡܨܝܐ ܠܦܪܩܐ ܡ̣ܢ ܗ̇ܘ ܛܟܼܣܐ ܗܦܟܝܐ ܥܬܝܩܐ ܕܫܘܪܝܐ ܕܫܬܐܣܬܐ ܕܓܒ̈ܐ ܦܘܠܝܛܝܩܝ̈ܐ ܓܘ ܬܒܼܝܠ. ܐܗܐ ܛܟܼܣܐ ܕܦܠܚܢܐ ܕܓܒ̈ܐ ܕܦܝܫܐ ܝܠܗ ܝܕܥܝܐ ܒܛܟܼܣܐ ܩܢܛܪܘܢܝܐ ܕܝܡܘܩܪܛܝܐ ܘܕܗܠ ܙܒܼܢܐ ܕܩܐܡ ܫܘܬܐܣ̈ܢ ܦܘܠܝܛܝܩܝ̈ܐ ܕܒܼܝܩ̈ܐ ܝܠܝܗܝ ܒܝܗ ܓܘ ܓܠܘܬܐ ܘܓܘ ܐܬܪܐ ܘܣܘܟܠܗ ܝܠܗ ܕܣܝܥܬܐ ܩܢܛܪܘܢܝܬܐ ܐܘ ܦܩܘܕܘܬܐ ܕܓܒܐ ܠܐ ܝܠܗ̇ ܐܬܝܬܐ ܒܚܕܐ ܐܘܪܚܐ ܕܓܘܒܝܐ ܒܢܝܬܐ ܥܠ ܛܟܼܣܐ ܕܝܡܘܩܪܛܝܐ ܕܡܫܘܬܦܬܐ ܕܟܠܝܗܝ ܗܕܡ̈ܐ ܕܗ̇ܘ ܫܘܬܐܣܐ ܦܘܠܝܛܝܩܝܐ ܒܝܗܒܼܠܬܐ ܕܩܠ̈ܝܗܝ ܥܠ ܗܕܡ̈ܐ ܡܘܚܫܚ̈ܐ ܠܫܩܠܐ ܡܫܬܐܠܢܘܬ݂̈ܐ ܦܪ̈ܝܫܐ ܓܘ ܗ̇ܘ ܫܘܬܐܣܐ.

ܐܝܡܢ ܕܣܝܥܬܐ ܕܦܩܘܕܘܬܐ ܒܗܘܝܐ ܝܠܗ̇ ܡܘܚܫܚܬܐ ܡ̣ܢ ܚܕ ܡܢܝܢܐ ܙܥܘܪܐ ܕܡܫܬܐܠܢ̈ܐ ܕܣܝܥܬ̈ܐ ܕܘܟܬܢܝ̈ܐ ܕܦܝܫܐ ܝܠܝܗܝ ܐܡܝܢܐܝܬ ܡܬܩܒܠܢܐ ܕܦܘܩܕܢ̈ܐ ܕܡܕܒܪܢܐ ܕܣܝܥܬܐ ܩܢܛܪܘܢܝܬܐ ܗܕܟܼܐ ܒܗܘܝܐ ܝܠܗ ܐܗܐ ܡܕܒܪܢܐ (ܐܘ ܕܪܒܐ ܓܒ̈ܐ ܟܐ ܩܪܝܠܗ ܢܛܪ ܐ݇ܪܙܐ ܓܘܢܝܐ) ܗܠ ܕܡܝܬ ܡܕܒܪܢܐ ܕܗ̇ܘ ܫܘܬܐܣܐ ܐܘ ܟܐ ܦܐܫ ܫܘܚܠܦܐ ܒܚܝܠܐ ܒܣܙܓܪܬܐ ܕܚܕ ܡܢܝܢܐ ܕܗܕܡ̈ܐ ܕܐܝܬܠܝܗܝ ܫܘܠܛܢܐ ܓܘ ܣܝܥܬܐ ܥܠܝܬܐ ܕܫܘܬܐܣܐ. ܒܐܗܐ ܨܘܪܬܐ ܫܠܛܘܢܐ ܝܠܝܗܝ ܥܠ ܫܘܬܐܣ̈ܢ ܦܘܠܝܛܝܩܝ̈ܐ ܐܢܝ݇ ܦܪ̈ܨܘܦܐ ܕܐܝܬܠܝܗܝ ܡܪ̈ܝܙܝܬܐ ܕܫܩܠܬܐ ܕܝܘܬܪ̈ܢܐ ܐܩܢܘܡܝܝ̈ܐ ܘܚܘܒܐ ܕܫܠܛܢܬܐ ܘܒܗܘܝܐ ܝܠܝܗܝ ܡܫܠܛܢ̈ܐ ܪܚܩܐ ܡܟܠ ܙܸܠܡܵܐ (ܠܘܡܐ) ܘܠܐ ܡܬܩܒܠܢ̈ܐ ܕܡܦܪܫܢܘܬܐ (ܩܪܝܛܝܩܝ) ܡ̣ܢ ܟܢܫܐ ܘܠܐ ܡ̣ܢ ܗܕܡ̈ܐ ܕܫܘܬܐܣܐ.

ܐܗܐ ܐܝܟܢܝܘܬܐ ܠܐ ܫܪܝܪܬܐ ܘܬܪܝܨܬܐ ܕܫܘܬܐܣ̈ܢ ܦܘܠܝܛܝܩܝ̈ܐ ܡܥܒܼܘܕܐ ܝܠܗ̇ ܕܫܘܬܐܣ̈ܢ ܦܘܠܝܛܝܩܝ̈ܐ ܠܐ ܝܠܗ ܗܘܝܐ ܓܘܝܗܝ ܕܘܪܫܐ ܕܫܚܠܦܬܐ ܘܡܬܛܘܪܢܘܬܐ ܕܫܒܼܝܠ̈ܐ ܘܐܘܪ̈ܚܬܐ ܕܦܠܚܢܐ ܡܛܠ ܬܫܡܫܬܐ ܕܢܝܫܐ ܕܥܡܢ ܘܦܠܚܬܐ ܩܐ ܚܪܒܣܬܐ ܘܙܝܦܬܐ ܕܨܒܼܘܬܢ ܐܘܡܬܢܝܬܐ ܦܣܘܥܬܐ ܒܬܪ ܦܣܘܥܬܐ ܠܩܕ݇ܡܐ ܥܠ ܚܕ ܚܘܪܙܐ ܬܪܝܨܐ ܡܘܕܒܼܩܐ ܡ̣ܢ ܢܣܝܢ̈ܐ ܥܠܡܝ̈ܐ ܘܝܘܠܦܢܝ̈ܐ ܕܒܪܢܫܘܬܐ ܘܥܡܡ̈ܐ ܡܫܘܘܫܛ̈ܐ.

ܐܝܡܢ ܕܪܫܢܘܬܐ ܕܫܘܬܐܣ̈ܢ ܦܘܠܝܛܝܩܝ̈ܐ ܒܗܘܝܐ ܝܠܝܗܝ ܡܫܠܛܢ̈ܐ ܐܡܝܢܝ̈ܐ ܘܕܟܬܬܘܪ̈ܝܐ ܒܗܘܝܐ ܝܠܝܗܝ ܟܠܝܗܝ ܦܘܣܩܢ̈ܐ ܦܠܝܛ̈ܐ ܡ̣ܢ ܗܓܝܬ̈ܐ ܘܫܪ̈ܝܬܐ ܦܪ̈ܨܘܦܝܐ، ܒܗܦܟܐ ܕܫܘܬܐܣ̈ܐ ܕܝܡܘܩܪ̈ܛܝܐ ܡܬܛܘܪ̈ܢܐ ܘܕܪ̈ܝܐ ܕܦܘܣܩܢ̈ܝܗܝ ܦܝܫ̈ܐ ܝܠܝܗܝ ܫܩܝܠ̈ܐ ܡ̣ܢ ܗܓܝܬ̈ܐ ܘܫܪ̈ܝܬܐ ܕܗܕܡ̈ܐ ܕܣܝܥܬܐ ܡܕܒܪܢܬܐ ܕܐܦ ܐܢܝ ܦܝܫܐ ܝܠܝܗܝ ܐܬܝ̈ܐ ܪܒܐ ܓܗ̈ܐ ܡ̣ܢ ܬܚܡܢܝܬ̈ܐ ܘܪ̈ܢܝܐ ܕܟܠܝܗܝ ܗܕܡ̈ܐ ܕܗ̇ܘ ܫܘܬܐܣܐ.

ܐܢ̈ܐ ܫܒܼܝܠ̈ܐ ܘܐܘܪ̈ܚܬܐ ܕܦܠܚܢܐ ܘܛܟܼܣ̈ܐ ܕܫܘܬܐܣ̈ܢ ܥܬܝܩ̈ܐ ܘܗܦܟܝ̈ܐ ܕܠܐ ܝܠܝܗܝ ܒܩܒܠܐ ܫܘܚܠܦܐ ܕܪܝܐ ܘܡܬܛܘܪܢܐ ܡܥܒܼܘܕܐ ܝܠܝܗܝ ܕܗܘܝ ܦܠܛ̈ܐ ܠܐ ܫܪܝܪ̈ܐ ܘܬܪ̈ܝܨܐ ܕܨܒܼܘܬܢ ܐܘܡܬܢܝܬܐ ܘܢܝܫܢ ܩܕܝܫܐ ܘܐܢ̈ܐ ܦܠܛ̈ܐ ܒܕ ܓܕܡܚܠܗܘܢ ܒܐܢ̈ܐ ܢܘܩܙ̈ܐ:

ܐ. ܓܒ̈ܐ ܡܚܝܠ̈ܐ ܕܠܐ ܡܨܝ ܫܩܠܝ ܡܫܬܐܠܢܘܬܐ ܕܨܒܼܘܬܢ ܐܘܡܬܢܝܬܐ ܡܛܠ ܕܩܪܝܚܬܐ ܝܠܗ̇ ܩܬܢ ܕܐܢ̈ܐ ܓܒ̈ܐ ܒܣܦܩܐ ܝܠܝܗܝ ܡ̣ܢ ܗܕܡ̈ܐ ܥܒܼܘܕ̈ܐ ܘܟܫܝܪ̈ܐ ܘܫܪܝܪ̈ܐ ܩܐ ܨܒܼܘܬܐ ܕܐܘܡܬܢ ܕܦܝܫܝ ܗܘܘ ܓܘܒܝ̈ܐ ܒܨܒܼܝܢܐ ܕܟܠܝܗܝ ܗܕܡ̈ܐ ܕܫܘܬܐܣܐ ܕܒܦܠܚܐ ܝܗܘܘ ܓܘܗ ܐܢ ܐܢ̈ܐ ܫܘܬܐܣܐ ܗܘܝ ܗܘܘ ܒܢܝ̈ܐ ܥܠ ܚܕ ܛܟܼܣܐ ܕܝܡܘܩܪܛܝܐ ܐܘܡܬܢܝܐ.

ܒ. ܚܕ݇ܟܡܐ ܡ̣ܢ ܡܫܬܐܠܢ̈ܐ ܕܫܘܬܐܣ̈ܢ ܦܝܫ̈ܐ ܝܠܝܗܝ ܙܒܼܝܢ̈ܐ ܒܝܕ ܒܥܠܕܒܼܒܼ̈ܐ ܕܨܒܼܘܬܢ ܐܘܡܬܢܝܬܐ ܘܚܕ݇ܟܡܐ ܒܠܝܓ̈ܐ ܝܠܝܗܝ ܒܟܦܫܬܐ ܕܥܘܬܪܐ ܘܚܡܝܬܗ ܓܘ ܒܢܟ̈ܐ ܓܘ ܡܥܪܒܼܐ ܘܐܚܪ̈ܢܐ ܚܢܝܩ̈ܐ ܓܘ ܚܘܕܪܐ ܕܫܘܡܗ̈ܐ ܬܘܕܝܬܢܝ̈ܐ ܘܬܫܥܬܢܝ̈ܐ. ܒܐܗܐ ܨܘܪܬܐ ܒܚܙܝܐ ܝܘܚ ܕܨܒܼܘܬܢ ܗܘܝܐ ܝܠܗ̇ ܡܘܦܠܚܬܐ ܩܐ ܢܝܫ̈ܝܗܝ ܦܪ̈ܨܘܦܝܐ ܘܢܝܫ̈ܐ ܕܒܥܠܕܒ݂ܒ݂̈ܐ ܘܒܗ̇ـܝ ܚܪܬܐ ܒܫܡܛܐ ܝܠܝܗܝ ܠܨܒܼܝܢܐ ܕܦܠܚܢܐ ܐܘܡܬܢܝܐ ܓܘ ܥܡܢ ܘܡܟܠܘܝܐ ܝܠܝܗܝ ܠܫܘܘܫܛܐ ܕܨܒܼܘܬܢ ܘܙܕܩ̈ܐ ܕܐܘܡܬܢ ܢܡܘܣܝ̈ܐ ܒܐܪܥܢ ܬܫܥܝܬܢܝܬܐ.

ܓ. ܦܪܝܬܐ ܕܓܒ̈ܢ ܘܠܐ ܡܨܝܬܐ ܕܒܪܝܬܐ ܕܚܕ݇ ܚܘܝܕܐ ܘܣܙܓܪܬܐ ܕܦܠܚܢܐ ܡܫܘܬܦܐ ܒܝܢܬ݂ ܕܐܢ̈ܐ ܫܘܬܐܣ̈ܐ ܦܘܠܝܛܝܩܝ̈ܐ. ܠܐ ܡܨܝܬܐ ܕܒܪܝܬܐ ܕܐܗܐ ܦܠܚܢܐ ܡܫܘܬܦܐ ܒܝܢܬ݂ ܕܐܢ̈ܐ ܫܘܬܐܣ̈ܐ ܡܥܒܼܘܕܐ ܝܠܗ̇ ܡܫܦܠܬܐ ܕܣܒܼܪܐ ܘܬܠܩܬܐ ܘܚܒܼܛܬܐ ܕܐܘܪ̈ܚܬܐ ܕܦܠܚܢܐ ܓܘ ܒܢ̈ܝ ܐܘܡܬܢ ܘܠܐ ܡܬܒܼܬܐ ܕܚܕ݇ ܪܐܙܐ ܡܛܘܟܣܐ ܩܐ ܦܠܚܢܐ ܐܘܡܬܢܝܐ ܓܘܢܐܝܬ.

ܫܡܥܢ̈ܐ ܕܡܐܡܪܢ ܡܘܚܒ̈ܐ ܘܫܪܝܪ̈ܐ ܠܐ ܡܬܫܠܝܢ̈ܐ ܡ̣ܢ ܠܦܠܚܐ ܩܐ ܢܝܫܢ ܩܕܝܫܐ ܘܨܒܼܘܬܢ ܐܘܡܬܢܝܬܐ ܘܚܘܝܕܢ ܓܡܝܪܐ، ܥܕܢܐ ܩܪܒܘܢܐ ܝܠܗ̇ ܘܣܝܒܪܬܢ ܒܦܪܩܐ ܝܠܗ̇ ܘܒܫܠܡܐ ܡܛܠ ܕܚܐܪܘܬܐ ܒܙܪܩܐ ܝܠܗ̇ ܘܛܠܘܡܝܐ ܘܚܫܟܐ ܒܓܢܝܐ ܝܠܗ ܘܐ݇ܚܪܢܐ ܠܐ ܗܘܐ ܕܘܟܐ ܘܠܐ ܫܘܦܐ ܩܐ ܒܪ̈ܝܢܐ ܕܦܘܠܓܼܐ.

ܐܕܝܘܡ ܒܢ̈ܝ ܐܘܡܬܢ ܒܪܓܼܫܐ ܝܠܝܗܝ ܘܒܓܠܝܐ ܠܒܥܠܕܒܼܒܼ̈ܐ ܕܨܒܼܘܬܢ ܡ̣ܢ ܙܘܒܢ̈ܐ ܕܓܢ̈ܝܗܝ ܘܡܚܝܠ̈ܐ ܕܪܢܝܐ ܕܚܘܝܕܐ ܕܐܘܡܬܢ ܘܟܠܝܗܝ ܐܢܝ ܕܐܚܟ̰ܝ ܬܚܡܘܢܐ ܝܠܝܗܝ ܒܗܢܝܢ̈ܐ ܦܪ̈ܨܘܦܝܐ، ܘܐܢܝ ܕܬܚܡܘܢ̈ܐ ܝܠܝܗܝ ܡܛܠ ܫܠܛܢܬܐ ܕܟܬܬܘܪܝܬܐ ܥܠ ܫܘܬܐܣ̈ܐ ܕܒܢ̈ܝ ܐܘܡܬܢ. ܐܢ̈ܐ ܫܠܕ̈ܐ ܚܡܝܩ̈ܐ ܓܘ ܙܒܼܠܬܐ ܕܬܫܥܝܬܐ ܘܐܘܪ̈ܚܬـܝܗܝ ܠܐ ܐ݇ܢܫܝ̈ܐ ܠܐ ܗܘܐܠܗܘܢ ܕܘܟܐ ܐܚܪܢܐ ܘܠܐ ܫܘܦܐ ܓܘ ܡܚܪܒܼܬܐ ܘܕܪܒܢܬܐ ܕܦܠܚ̈ܐ ܘܐܓܼܘܢܣܛ̈ܐ ܡܚܦܛܢ̈ܐ ܡܛܠ ܕܒܥܒܼܪܐ ܝܘܚ ܓܘ ܚܕ݇ ܡܫܩܠܐ ܚܕ݇ܬܐ ܕܝܠܗ ܡܫܩܠܐ ܕܚܐܪܘܬܐ ܘܦܠܚܢܐ ܡܛܘܟܣܐ ܥܠ ܐܘܪ̈ܚܬܐ ܚܕ݇ܬ̈ܐ ܘܫܒܼܝܠ̈ܐ ܡܬܛܘܪ̈ܢܐ ܒܢܝ̈ܐ ܥܠ ܐܣ̈ܐ ܕܝܡܘܩܪ̈ܛܝܐ ܕܝܠܝܗܝ ܡܒܘܥ̈ܐ ܩܐ ܫܘܘܫܛܐ ܕܥܡܡ̈ܐ ܘܥܡܢ ܝܠܗ ܚܕ ܡ̣ܢ ܥܡܡ̈ܐ ܕܐܝܬܠܗ ܬܫܥܝܬܐ ܝܪܝܟܼܬܐ ܕܚܘܕܬܐ ܘܒܪܝܬܐ ܕܢܡܘܣ̈ܐ ܘܫܒܼܝܠ̈ܐ ܝܘܠܦܢܝ̈ܐ  ܓܡܝܪ̈ܐ ܕܗܘܐ ܠܗܘܢ ܡܗܕܝܢ̈ܐ ܕܒܪܢܫܘܬܐ ܠܡܬܘܒܼܐ ܩܐ ܓܢ̈ܝܗܝ ܛܟܼܣ̈ܐ ܟܢܘܫܝܝ̈ܐ ܡܬܛܘܪ̈ܢܐ ܕܐܕܝܘܡ ܝܘܡܐ ܡܛܝܐ ܝܠܝܗܝ ܠܚܕ ܕܪܓܼܐ ܥܠܝܐ ܕܬܚܡܢܬܐ ܘܪܢܝܐ ܟܢܘܫܝܝܐ ܕܝܡܘܩܪܛܝܐ ܘܐ݇ܢܫܝܐ ܘܕܒܗܘܝܐ ܝܠܗ ܫܘܪܐ ܕܡܣܬܪܢܘܬܐ ܕܙܕܩ̈ܐ ܕܥܡܡ̈ܐ ܛܠܝܡ̈ܐ.