ܡܪܕܘܬܐ ܕܙܥܘܦܘܬܐ [1]
ܓܕܫ̈ܐ ܕܩܘܘܡܐ ܝܠܝܗܝ ܘܒܓܕܫܐ ܥܠ ܥܡܢ ܓܘ ܥܝܪܩ ܠܐ ܝܠܝܗܝ ܢܘܟ݂ܪ̈ܝܐ ܥܠ ܥܡܢ ܕܚܙܝܐ ܝܠܗ ܡ̣ܢ ܪ̈ܕܘܦܝܐ ܘܛܠܘܡܝ̈ܐ ܓܘ ܬܫܥܝܬܗ ܝܪܝܟ݂ܬܐ ܒܕܥܒ݂ܪ، ܟܕ ܠܐ ܝܠܗ ܒܦܝܕܐ ܐܘ ܥܒ݂ܪܐ ܥܠ ܥܡܢ ܚܕ ܕܪܐ ܕܠܐ ܝܠܝܗܝ ܒܪܒܪ̈ܝܐ ܕܡܪܕܘܬܐ ܕܒܪܝܐ ܒܕܪܝܐ ܣܢܝܘܬܐ ܥܠ ܒܢܘܢ̈ܢ ܬܚܘܬ ܥܠܬ̈ܐ ܦܪ̈ܝܫܐ.
ܟܠܝܗܝ ܬܘܕܝܬ̈ܐ ܫܡܝܢܝ̈ܐ ܟܐ ܗܡܢܝ ܒܚܕ ܐܠܗܐ ܝܚܝܕܝܐ ܐܝܢܝ ܕܝܠܗ ܪܡܙܐ ܕܛܒ݂ܘܬܐ ܘܫܠܡܐ ܩܐ ܒܪܢܫܐ ܘܡܘܕܝ ܕܝܠܗ ܓܘܢܗ ܘܓܢܣܗ.
ܝܘܠܦܢܐ ܕܢܒ݂ܝ̈ܐ ܐ݇ܬܝܐ ܝܠܗ ܡܛܠ ܛܒ݂ܘܬܐ ܘܫܠܡܐ ܕܐܗܐ ܒܪܢܫܐ ܕܦܝܫܐ ܝܠܗ ܡܘܒܪܝܐ ܡ̣ܢ ܒܪܝܢܐ ܐܝܢܐ ܕܐܟ݂ܝ ܒܩܒܠܐ ܝܠܗ ܒܪܢܫܐ ܡܪܐ ܕܗܘܢܐ ܘܕܐܟ݂ܝ ܠܐ ܝܠܗ ܦܪܡܘܝܐ ܗܕܼܝܘܛܐ[2]، ܘܗܠ ܡܬܗܘܝܢܬܐ ܝܠܗ̇ ܕܐܝܬ ܬܪ̈ܝܢ ܐܠܗ̈ܐ ܓܘ ܫܡܝܐ، ܐܠܗܐ ܕܒܝܫܬܐ ܘܐܠܗܐ ܕܛܒ݂ܬܐ ܐܝܟܼ ܕܐ݇ܬܝܐ ܝܠܗ ܓܘ ܗܘܡܣ̈ܐ ܥܬܝܩ̈ܐ ܒܕܥܒ݂ܪ.
ܐܢ ܠܐ ܗܘܝ ܗܘܘ ܐܢ̈ܐ ܐ݇ܢܫ̈ܐ ܕܫܩܝܠܐ ܝܠܝܗܝ ܡܪܕܘܬܐ ܕܙܥܘܦܘܬܐ ܓܘ ܐܬܪܢ ܡ̣ܢ ܡܙܟܝܢ̈ܐ[3] ܘܓܒܐ ܕܐܠܗܐ ܒܝܫܐ ܠܐ ܓܕܫ ܗܘܐ ܟܠܗ ܐܗܐ ܛܠܘܡܝܐ ܘܪܕܘܦܝܐ ܘܩܛܠܐ ܥܠ ܒܢܘܢ̈ܐ ܕܒܝܬܢܗܪ̈ܝܢ ܫܪ̈ܫܝܐ.
ܐܢ̈ܐ ܐ݇ܢܫ̈ܐ ܕܛܥܝܢܐ ܝܠܝܗܝ ܡܪܕܘܬܐ ܕܙܥܘܦܘܬܐ ܕܡܦܠܘܚܘܗ̇ ܝܠܝܗܝ ܕܪܩܘܒ݂ܠ ܒܢܘܢ̈ܐ ܕܐܬܪܐ ܕܒܝܬܢܗܪ̈ܝܢ، ܐܢܝ ܝܠܝܗܝ ܐܢܝ݇ ܒܪܒܪ̈ܝܐ ܕܗܠܐ ܒܚܝܐ ܝܠܝܗܝ ܓܘ ܕܪ̈ܐ ܟܐܦܝ̈ܐ ܘܗܡܘܢܐ ܝܠܝܗܝ ܕܐܝܬ ܓܘ ܐܝܬܘܬܐ ܐܠܗ̈ܐ ܦܪ̈ܝܫܐ ܘܚܬܝܬܐܝܬ ܐܢܝ ܝܠܝܗܝ ܡ̣ܢ ܓܒܐ ܕܐܠܗܐ ܕܒܝܫܬܐ ܕܠܐ ܗܡܢ ܐܠܐ ܒܪܢܝܐ ܕܣܝܦܐ ܘܦܪܡܬܐ ܠܟܠ ܚܕ ܕܐܝܬ ܠܗ ܡܪܕܘܬܐ ܠܐ ܡܘܕܡܝܬܐ ܠܡܪܕܘܬܗ ܒܪܒܪܝܬܐ ܕܚܝܐ ܝܠܗ ܓܘܗ̇ ܡ̣ܢ ܙܒ݂ܢ̈ܐ ܝܪ̈ܝܟ݂ܐ.
ܡܕܝܢܝܘܬܐ ܕܒܝܬܢܗܪ̈ܝܢ ܡܘܠܦܬܐ ܝܠܗ̇ ܩܬܢ ܕܦܫܛܚ ܐܝܕܐ ܕܥܘܕܪܢܐ ܘܫܠܡܐ ܘܚܘܒܐ ܠܟܠܝܗܝ ܡܕܝܢܝܘܬ̈ܐ ܐ݇ܚܪ̈ܢܐ ܐܢ ܕܝܠܝܗܝ ܩܘܪܒܐ ܐܘ ܪܚܩܐ ܡܢܢ. ܡܕܝܢܝܘܬܐ ܕܥܡܐ ܕܐܬܪܢ ܝܗܘܐ ܐܡܝܢܐܝܬ ܓܘ ܛܘܘܪܐ ܘܫܘܘܫܛܐ ܥܕܡܐ ܕܓܝܣܬܐ[4] ܕܡܕܝܢܝܘܬܐ ܕܙܥܘܦܘܬܐ ܘܩܛܠܐ ܘܦܪܡܬܐ ܕܐ݇ܬܐ ܠܗ̇ ܡ̣ܢ ܒܲܪܝܼܵܐ ܘܐܝܢܝ ܕܟܐ ܚܝܐ ܗܘܐ ܥܠ ܙܥܘܦܘܬܐ ܘܫܠܛܢܬܐ ܕܚܝܠܢܐ.
ܝܐ ܒܢܘܢ̈ܐ ܕܒܝܬܢܗܪ̈ܝܢ ܡܕܝܢܝܘܬܘܟ݂ܘܢ ܦܝܫܠܗ̇ ܓܘ ܩܢܛܐ ܡ̣ܢ ܗ̇ܘ ܝܘܡܐ ܕܓܝܣܬܐ ܕܡܕܝܢܝܘܬܐ ܕܒܪܝܐ ܥܠ ܥܡܢ ܐܝܢܝ ܕܠܐ ܗܡܢ ܣܛܪ ܡ̣ܢ ܩܛܠܐ ܘܙܥܘܦܘܬܐ، ܡܘܕܝ ܝܬܘܢ ܒܣܦܪܐ ܡ̣ܢ ܗ̇ܘ ܓܢܣܐ ܕܗܡܘܢܐ ܝܠܗ ܒܐܠܗܐ ܕܒܝܫܘܬܐ ܕܒܦܪܡܐ ܝܠܗ ܘܒܬܠܚܐ ܠܒܬ̈ܢ ܘܘܒܝܬ ܩܘܕܫ̈ܢ.
ܠܐ ܡܨܚ ܠܦܪܩܐ ܡ̣ܢ ܡܪܕܘܬܐ ܕܙܥܘܦܘܬܐ ܟܡܐ ܕܗܘܝܐ ܗܝܡܢܘܬܢ ܒܐܠܗܐ ܕܛܒ݂ܘܬܐ ܘܐܢ ܠܐ ܝܘܚ ܗܡܘܢܐ ܒܐܠܗܝ ܕܫܩܝܠܐ ܝܠܗ ܒܐܝܕܗ ܣܝܦܐ ܘܒܬܠܚܐ ܝܠܗ ܟܠ ܚܕ ܪܡܙܐ ܕܡܕܝܢܝܘܬܐ ܓܘ ܐܬܪܢ ܫܪܫܝܐ ܒܝܬܢܗܪ̈ܝܢ.
ܡܪܕܘܬܐ ܕܙܥܘܦܘܬܐ ܕܫܘܠܛܢܬܐ ܝܠܗ̇ ܥܠ ܐܬܪܐ ܕܒܝܬܢܗܪ̈ܝܢ ܒܥܝܐ ܫܝܦܐ ܠܬܫܥܝܬܐ ܕܥܡܢ ܡ̣ܢܗ ܘܡܩܡܐ ܒܫܘܦܗ̇ ܬܫܥܝܬܐ ܕܡܪܕܘܬܐ ܕܙܥܘܦܘܬܐ ܕܦܐܫ ܐܬܪܢ ܕܘܟܐ ܕܓܢܒ݂̈ܐ ܘܩܛܥܢ̈ܐ ܕܐܘܪ̈ܚܬܐ ܘܚܝܒ݂̈ܐ[5] ܐܝܢܝ ܕܠܝܬ ܠܗܘܢ ܕܘܟܐ ܓܘ ܥܠܡܐ ܕܡܕܝܢܝܘܬܐ.
ܛܠܝܒܬܐ ܝܠܗ̇ ܡ̣ܢ ܒܢ̈ܝ ܐܘܡܬܢ، ܡܘܕܝ ܕܝܠܗ̇ ܗܝܡܢܘܬܝܗܝ ܦܘܠܝܛܝܩܝܬܐ ܐܘ ܬܘܕܝܬܢܝܬܐ ܕܗܘܝ ܡܬܐܘܝܢ̈ܐ ܘܡܚܘܝܕ̈ܐ ܥܠ ܢܝܫܐ ܐܬܪܝܐ ܡܛܠ ܦܪܩܬܐ ܡܐ ܕܒܦܝܫܐ ܝܠܗ ܡ̣ܢ ܡܕܝܢܝܘܬܐ ܕܐܬܪܐ ܕܒܝܬܢܗܪ̈ܝܢ ܘܗܘܝ ܕܪܩܘܒ݂ܠ ܟܠ ܪܢܝܐ ܕܙܥܘܦܘܬܐ، ܕܫܒ݂ܛܝܘܬܐ ܘܦܪܫܬܐ ܒܝܢܬ݂ ܒܢܘܢ̈ܗ، ܡܛܠ ܡܪܕܘܬܐ ܕܙܥܘܦܘܬܐ ܫܒ݂ܛܝܬܐ ܠܐ ܝܠܗ̇ ܫܒ݂ܘܩ ܡ̣ܢ ܚܕܐ ܡܢܬ݂ܐ ܠܐ ܡܬܦܠܓ݂ܢܬܐ ܡ̣ܢ ܡܕܝܢܝܘܬܐ ܕܙܥܘܦܘܬܐ ܘܣܝܦܐ ܕܒܪܝܐ، ܘܝܠܗ̇ ܥܠܝܠܬܐ[6] ܘܢܘܟ݂ܪܝܬܐ ܥܠ ܡܕܝܢܝܘܬܐ ܕܐܬܪܢ ܐܝܢܝ ܕܦܝܫܬܐ ܗܘܐ ܡܫܘܡܗܬܐ ܒܝܕ ܛܒ݂ܘܬܐ ܘܫܠܡܐ ܠܟܠܝܗܝ ܒܢܘܢ̈ܐ ܕܐܗܐ ܐܬܪܐ ܕܝܗܘܐ ܩܠܥܐ ܘܚܣܢܐ ܩܐ ܡܕܝܢܝܘܬܐ ܘܡܢܬܝܬܐ.
ܡܪܕܘܬܐ ܕܙܥܘܦܘܬܐ ܐܝܢܝ ܕܬܪܣܘܝܘܠܗ̇ ܡܪܕܘܬܐ ܫܒ݂ܛܝܬܐ ܦܪܫܢܬܐ ܠܐ ܝܠܗ̇ ܡܪܕܘܬܐ ܐܬܪܝܬܐ ܡܛܠ ܡܬܘܒ݂ܐ ܝܠܗ̇ ܬܚܘܡ̈ܐ ܘܦܘܪ̈ܫܘܢܝܐ ܒܝܢܝ ܚܕ ܥܡܐ ܘܒܦܪܫܐ ܝܠܝܗܝ ܠܫܒ݂ܛ̈ܐ ܘܩܘܒܘܚܝܬ̈ܐ ܕܡܨܝܐ ܠܫܠܛܘܢܐ ܥܠܝܗܝ ܡܛܠ ܕܐܗܐ ܡܪܕܘܬܐ ܗܠܐ ܒܚܝܐ ܝܠܗ̇ ܥܠ ܚܙܝܬܐ ܘܬܐܘܪܝܐ ܡܝܟܐܦ̮ܝܠܝܬܐ ܕܦܠܓ݂ܬܐ ܘܫܠܛܢܬܐ ܘܡܛܠ ܕܐܗܐ ܡܪܕܘܬܐ ܠܝܬ ܠܗ̇ ܗܝܡܢܘܬܐ ܒܐܬܪܐ ܣܛܪ ܡ̣ܢ ܗܝܡܢܘܬܗ̇ ܒܝܕ ܫܒ݂ܛܝܘܬܐ ܘܠܐ ܝܠܗ̇ ܦܪܡܘܝܐ ܕܣܘܥܪ̈ܢܗ̇ ܐܢ̈ܐ ܠܐ ܝܠܝܗܝ ܫܒ݂ܘܩ ܡ̣ܢ ܡܬܝܚܘܬܐ ܕܡܕܝܢܝܘܬܐ ܒܪܒܪܝܬܐ ܕܒܪܝܐ ܕܥܒ݂ܪܬܐ ܝܠܗ̇ ܥܠ ܒܢܘܢ̈ܐ ܕܐܬܪܐ ܕܒܝܬܢܗܪ̈ܝܢ ܘܦܠܛܝܗܝ ܐܚܟ̰ܝ ܝܠܝܗܝ ܦܩܝܪܘܬܐ ܘܣܠܒܬܐ ܐܢܝ ܚܐܪ̈ܘܝܬܐ ܒܫ ܒܫܝܛ̈ܐ ܕܐ݇ܢܫܘܬܐ ܘܚܪܬܐ ܥܒ݂ܪܬܐ ܕܐܟ݂ܠܐ ܓܘ ܫܒ݂ܛܗ ܠܐܟ݂ܠܗ̇ ܘܚܪܬܐ ܢܦܠܬܗ̇ ܘܦܪܩܬܐ ܕܡܕܝܢܝܘܬܐ ܩܝܡܬܐ ܟܠܢܐܝܬ ܒܐܪܥܐ ܕܒܝܬܢܗܪ̈ܝܢ.
ܡ̣ܢ ܝܘܡܐ ܩܕܡܝܐ ܕܢܦܠܬܐ ܕܫܘܠܛܢܐ ܕܟܬܬܘܪܝܐ ܕܨܕܡ ܓܘ ܥܝܪܩ ܚܙܐܠܢ ܡܫܠܛܢܬܐ ܕܡܪܕܘܬܐ ܕܙܥܘܦܘܬܐ ܫܒ݂ܛܝܬܐ ܟܕ ܟܠ ܝܘܡܐ ܕܥܒ݂ܪܐ ܝܠܗ ܥܠܢ ܒܚܙܝܐ ܝܘܚ ܒܨܪܬܐ ܕܙܕܩ̈ܐ ܘܚܐܪ̈ܘܝܬܐ ܓܘܢܝ̈ܐ ܩܐ ܒܪܢܫܐ ܕܐܬܪܐ ܕܒܝܬܢܗܪ̈ܝܢ.
ܐܢ ܪܘܦܐ ܠܢ ܚܕܐ ܓܫܩܬܐ ܣܘܪܗܒ݂ܝܬܐ ܥܠ ܥܝܪܩ ܕܐܕܝܘܡ ܘܥܝܪܩ ܩܕ݇ܡ ܚܡܫܝܢ ܫܢ̈ܐ ܒܕ ܚܙܚ ܐܡܝܢܘܬܐ ܕܒܨܪܬܐ ܕܙܕܩ̈ܐ ܐ݇ܢܫܝ̈ܐ ܓܘ ܐܬܪܐ، ܟܕ ܐ݇ܬܡܠ ܝܗܘܘ ܟܠܝܗܝ ܬܘܕܝܬ̈ܐ ܡ̣ܢ ܡܫܠܡܢ̈ܐ ܘܡܫܝܚܝ̈ܐ ܘܐܝܙܝܕܝ̈ܐ … ܘܫܪ ܒܥܒ݂ܕܐ ܠܛܩܣܝܗܝ ܒܚܐܪܘܬܐ ܘܫܠܡܐ ܘܕܠܐ ܙܕܘܥܬܐ ܘܙܕܩ̈ܐ ܕܫܒ݂ܪ̈ܐ ܘܚܐܪ̈ܘܝܬܐ ܕܢܫ̈ܐ ܢܛܝܪ̈ܐ ܝܗܘܘ ܒܫ ܝܬܝܪ ܡ̣ܢ ܐܕܝܘܡ ܘܡ̣ܢ ܒܬܪ ܒܫ ܝܬܝܪ ܡ̣ܢ ܒܠܓܐ ܕܕܪܐ ܒܚܙܝܐ ܝܘܚ ܓܝܓ݂ܠܐ ܕܬܫܥܝܬܐ ܒܕܥܪܐ ܝܠܗ̇ ܠܒܬܪܐ ܒܗܦܟܐ ܕܬܐܘܪܝܐ ܕܡܬܛܘܪܢܘܬܐ ܕܡܕܝܢܝܘܬܐ ܐܝܢܝ ܕܒܓܕܫܐ ܝܠܗ̇ ܓܘ ܥܠܡܐ ܐܕܝܘܡ.
ܩܢܛܐ[7] ܕܡܒܝܘܢܐ ܝܠܗ ܓܘ ܪܩܝܥܐ ܕܐܬܪܐ ܕܒܝܬܢܗܪ̈ܝܢ ܥܠ ܡܕܝܢܝܘܬܐ ܕܐܗܐ ܐܬܪܐ ܐܝܟ݂ ܡܩܕܬܐ ܕܥܕܬ̈ܐ ܘܩܛܠܬܐ ܘܚܛܦܬܐ ܕܒܢ̈ܝ ܐܘܡܬܢ ܐܬܘܪܝܬܐ ܘܫܝܦܬܐ ܕܟܠܝܗܝ ܡܒܝܢܝܬ̈ܐ ܕܣܓܝ ܬܘܕܝܬ̈ܐ ܘܐܘܡܘܬ̈ܐ ܝܠܗ ܩܢܛܐ ܓܘܪܐ ܘܵܠܹܐ ܝܠܗ̇ ܥܠ ܟܠ ܛܒ݂ܐ ܘܚܐܪܐ ܘܗܘܡܢܐ ܒܡܕܝܢܝܘܬܢ ܘܡܘܕܝ ܕܝܠܗ̇ ܗܝܡܢܘܬܗ ܕܟܠܐ ܒܦܬܐ ܕܐܗܐ ܩܢܛܐ ܒܟܠܝܗܝ ܫܒ݂ܝܠ̈ܐ ܡܬܡܨܝܢ̈ܐ ܡܛܠ ܐܢܝ ܕܒܩܝܡܐ ܝܠܝܗܝ ܒܐܗܐ ܙܥܘܦܘܬܐ ܠܐ ܦܪܡܝ ܣܛܪ ܡ̣ܢ ܠܫܢܐ ܕܙܥܘܦܘܬܐ ܘܩܛܠܐ ܘܠܐ ܡܨܐ ܥܡܢ ܠܦܪܩܐ ܡܢܝܗܝ ܟܡܐ ܕܗܘܐ ܐ݇ܢܫܝܐ ܘܡܗܡܢܐ ܒܫܠܡܐ، ܗ̇ܘ ܠܐ ܦܪܩ ܡ̣ܢ ܐܢ̈ܐ ܝܗܠ̈ܐ ܒܪܒܪ̈ܝܐ ܘܒܥܝܪ̈ܐ[8] ܕܠܐ ܗܡܢܝ ܣܛܪ ܡ̣ܢ ܡܪܕܘܬܐ ܕܙܥܘܦܘܬܐ ܫܒ݂ܛܝܬܐ ܐܝܢܝ ܕܒܥܝܐ ܫܚܠܦܐ ܠܡܕܝܢܝܘܬܐ ܕܒܝܬܢܗܪ̈ܝܢ ܒܡܕܝܢܝܘܬܐ ܫܒ݂ܛܝܬܐ ܒܪܒܪܝܬܐ ܕܡܨܝܐ ܠܡܩܘܕܼܐ ܟܠܝܗܝ ܡܒܝܢܝܬ̈ܐ ܕܡܕܝܢܝܘܬܐ ܡ̣ܢ ܐܪܥܐ ܕܐܬܪܐ ܕܥܝܪܩ ܘܛܪܕܬܐ ܘܓܪܕܬܐ ܕܒܢܘܢ̈ܗ ܫܪ̈ܫܝܐ ܘܡܕܝܢܝܘܬܗ ܡܫܘܫܛܬܐ ܡ̣ܢ ܐܪܥܢ ܬܫܥܝܬܢܝܬܐ.
[1] ܙܥܘܦܘܬܐ: ܥܘܢܦ̮، ܥܙܝܙܘܬܐ
[2] ܗܕܼܝܘܛܐ: ܒܪܝܪܐ، ܠܐ ܦܪܡܝܢܐ
[3] ܡܙܟܝܢ̈ܐ، ܡܟܫܛܢ̈ܐ، ܐܢܨܐܪ
[4]ܓܝܣܬܐ: ܫܦܢܬܐ ܓܼܙܘ
[5] ܡܚܝܒ݂ܢܐ: ܗ̇ܘ ܐ݇ܢܫܐ ܚܝܒ݂ܐ، ܡܘܓ̰ܪܡ
[6] ܥܠܝܠܬܐ: ܥܒ݂ܝܪܬܐ، ܕܚܝܠܐ
[7] ܩܢܛܐ: ܡܡܛܝܬܐ ܕܚܪܒܝܘܬܐ، ܚܛܪ
[8] ܒܥܝܪ̈ܐ: ܘܗܫܝ̈ܐ، ܗܝܘܢ̈ܐ