ܪ̈ܘܡܝܬܐ ܕܩܐ ܕܘܪ̈ܐ ܦܝܫܐ ܝܗܘܘ ܡܘܢܫܝܐ ܒܐ݇ܢܫ̈ܐ، ܡܠܝܐ ܝܗܘܘ ܡ̣ܢ ܟܠ ܬܗܪ ܟܬܝܒ݂ܝܬ̈ܐ ܘܢܘܗܪ̈ܐ ܕܝܗܘܘ ܚܕ݇ ܡܠܘܐܐ ܝܚܝܕܝܐ ܘܐ݇ܪܙܐ ܛܫܝܐ ܕܬܫܥܝܬܐ ܕܕܘܢܝܐ ܥܬܝܩܬܐ، ܐܝܢܝ ܕܐܚܪܬܐ ܦܝܫܠܗܘܢ ܦܘܠܛܐ ܘܣܘܦܝܐ ܠܐܝܕܬ̈ܐ ܕܐ݇ܢܫ̈ܐ ܕܒܛܥܝܐ ܝܗܘܘ ܒܬܪܝܗܝ، ܡ̣ܢ ܕܘܠܬܐ ܕܐܢ̈ܐ ܥܘܗܕܢܗܐ ܐܗܐ ܕܘܪܐ ܕܕܝܢ ܒܚܙܝܐ ܥܝܢ ܒܓܼܠܐ ܝܢ ܐܫܟܪܐܝܬ ܠܗ̇ܝ ܐܬܘܪ ܓܢ݇ܒܪܬܐ، ܕܩܐ ܪܒܐ ܕܘܪ̈ܐ ܬܠܝܩܬܐ ܝܗܘܐ ܡܥܠ ܦܬܐ ܕܣܬܪܐ ܕܐܡܘܬ̈ܐ، ܐܕܝܐ ܡܚܘܕܬܐ ܘܕܒ݂ܝܩܬܐ ܠܕܘܟܘܗ̇ ܓܘ ܬܫܥܝܬܐ ܕܕܘܢܝܐ، ܦܘܠܚܢ̈ܐ ܘܕܘܒܪ̈ܐ ܕܙܒ݂ܢܘܗ̇، ܚܕܟ̰ܐ ܦܝܫܐ، ܪܒܐ ܓܗ̈ܐ ܒܘܫ ܨܦܝܝ ܦܝܫܐ ܝܢܐ ܡܘܕܥܐ ܩܬܢ ܡ̣ܢ ܐܢܝ ܕܟܠܝܗܝ ܐܡܘܬ̈ܐ ܐ݇ܚܪ̈ܢܐ ܕܕܘܢܝܐ ܥܬܝܩܬܐ.

ܐܡܦܪܬܘܪܘܬܐ ܓܢ݇ܒܪܬܐ ܕܐܬܘܪ ܓܪܓ ܠܐ ܦܝܫܐ ܗܕܟ݂ܐ ܚܫܝܒ݂ܬܐ ܕܡܢܫܠܬܢܐ ܩܡܠܗ ܘܡܛܠܗ̇ ܠܚܕ ܗܕܟ݂ܐ ܚܝܠܐ ܥܠܝܐ، ܐܝܢܐ ܕܪܩܘܒ݂ܠ ܕܐܗܐ ܗ̇ܝ ܫܘܪܠܗ̇ ܢܝܚܐ ܒܢܝܚܐ ܗܠ ܕܚܪܬܐ ܦܫܠܗ̇ ܡܘܟܡܠܬܐ ܒܚܝܠܐ. ܕܠܐ ܦܘܫܟ݂ܐ (ܫܟܘܬܐ) ܐܗܐ ܐܘܡܬܐ ܫܒ݂ܝܚܬܐ ܕܒܐܠܗܘܬܐ ܦܝܫܬܐ ܝܗܘܐ ܓܘܒܝܬܐ ܕܗܕܟ݂ܐ ܡܓܪܘܣܐ ܗܘܐ، ܠܐ ܝܠܗ̇ ܫܒ݂ܝܩܬܐ ܩܬܢ ܡܠܘܐܐ ܡܠܝܢܐ ܒܘܬ ܬܫܥܝܬܘܗ̇ ܕܝܘܡܢ̈ܐ ܩܕ݇ܡܝ̈ܐ، ܐܝܟ݂ ܕܐܝܬܠܢ ܒܘܬ ܙܒ݂ܢܐ ܕܓܢ݇ܒܪܘܬܐ ܘܚܝܠܬܢܘܬܘܗ̇، ܕܐܘܦ ܐܚܢܢ ܐܕܝܘܡ ܕܡܨܚ ܗܘܘ ܠܟܬܒ݂ܐ ܒܡܠܝܘܬܐ ܒܘܬ ܟܠܝܗܝ ܥܘܛܡ̈ܐ ܘܫܒ݂ܝܠ̈ܐ ܕܗܘܐ ܠܗܘܢ ܥܠܬܐ ܕܡܘܡܛܝܠܗܘܢ ܠܐܗܐ ܪܘܡܪܡܐ ܥܠܝܐ ܕܥܘܫܢܐ ܘܬܩܝܦܘܬܐ.

ܡܒܘܥܐ:

ܬܫܥܝܬܐ ܕܒܝܬܢܗܪ̈ܝܢ

ܐܫܥܝܐ ܫܡܫܐ ܕܘܝܕ