ܡܢܬ݂ܐ 2

ܢܝܢܘܐ ܗܕܟ݂ܐ ܣܪܝܐܝܬ ܦܝܫܬܐ ܝܗܘܐ ܡܫܘܝܬܐ ܥܡ ܐܪܥܐ، ܕܐܘܚܟ̰ܐ ܥܕܢܐ ܠܐ ܓܪܫܠܗ̇ ܩܐ ܕܐܘܦ ܫܡܐ ܝܚܝܕܝܐ ܘܩܕܝܫܐ ܕܐܬܘܪ، ܗ̇ܘ ܕܒܝܕܓ݂ܘܗܝ ܦܘܪܦܪܬܐ ܝܗܘܐ ܓܘ ܡܕܢܚܐ ܗܠ ܡܥܪܒ݂ܐ، ܘܡ̣ܢ ܓܪܒܝܐ ܗܠ ܬܝܡܢܐ، ܚܕܟ̰ܐ ܡ̣ܢ ܒܬܪ ܗܕܐ ܦܝܫܐ ܝܘܗܐ ܡܘܢܫܝܐ، ܘܐܚܟ̰ܝ ܦܝܫܐ ܝܗܘܐ ܕܟ݂ܝܪܐ ܒܐܘܪܚܐ ܕܡܬܠܝܬ̈ܐ ܘܣܦܝܢܘܬ̈ܐ ܕܠܐ ܒܢܝܬ ܘܫܪܪܐ.

ܢܝܢܘܐ ܡܪܬܐ ܠܚܘܕܝܬܐ ܘܡܫܬܒ݂ܗܪܢܬܐ ܕܟܠܗ̇ ܡܬܥܡܪܢܝܬܐ ܝܗܘܐ ܗܠ ܕܘܪܐ ܕܫܒ݂ܥܐ ܡ̣ܢ ܩܕ݇ܡ ܡܫܝܚܐ، ܒܫܡܘܗ̇ ܟܐ ܝܡܝ ܗܘܘ ܟܠܝܗܝ ܛܝܦ̈ܐ، ܘܐܡܘܬ̈ܐ ܐܝܬ ܗܘܘ ܠܗܘܢ ܐܝܩܪܐ ܩܬܘܗ̇، ܡܛܠ (ܣܒܒ) ܡܘܬܒ݂ܐ ܩܕܝܫܐ ܕܢܝܢܝܒ ܐܠܗܐ ܝܗܘܐ ܘܐܪܫܟ݂ܝܬܐ ܕܡܠܟ ܡܠܟ̈ܐ .

ܟܙܢܦ̮ܘܢ ܝܘܢܝܐ ܕܪܝ ܕܘܪ̈ܐ ܡ̣ܢ ܒܬܪ ܗܕܐ ܐܝܡܢ ܕܒܥܒ݂ܪܐ ܝܗܘܐ ܡ̣ܢ ܠܟܣܠܘܗ̇، ܚܙܠܗ ܠܩܘܚܢ̈ܐ ܘܪܘܡܝܬ̈ܐ ܕܥܦܪܐ ܕܡܟܘܣܐ ܝܗܘܘ ܠܐܢܝ ܚܪ̈ܒܐ ܩܕܝܫ̈ܐ، ܐܝܢܐ ܟܕ ܠܐ ܡܨܠܗ ܡܫܟ̰ܘܚܐ ܚܕ ܐ݇ܢܫܐ ܕܡܕܥ ܗܘܐ ܩܬܘܗܝ، ܕܐܢ̈ܐ ܪ̈ܘܡܝܬܐ ܝܗܘܘ ܡܕܝܢܬ̈ܐ ܕܢܝܘܐ، ܒܘܬ ܐܗܐ ܚܫܒ݂ܠܗ ܩܘܡܐ ܕܗܘܝ ܚܪ̈ܒ݂ܐ ܕܚܕܐ ܡ̣ܢ ܡܕܝܢܬ̈ܐ ܥܬܝܩ̈ܐ، ܒܘܬ ܐܗܐ ܐ݇ܢܫ̈ܐ ܠܐ ܝܢܐ ܒܝܕܥܐ ܒܘܬ ܕܝܝܗܝ.

ܗܕܟ݂ܐ ܟܪܝܐ ܝܗܘܐ ܙܒ݂ܢܐ ܕܟܠܗ̇ ܡܫܡܗܘܬܐ ܘܪܒܘܬܐ ܕܐܗܐ ܡܕܝܢ݇ܬܐ ܕܩܐ ܚܕ݇ ܗܕܟ݂ܐ ܕܘܪ̈ܐ ܗܘܝܬܐ ܝܗܘܐ ܡܗܟܘܡܐ ܥܠ ܟܠܗ̇ ܓܠܘܠܘܬܐ. ܒܗܕܟ݂ܐ ܙܠܘܡܝܐ ܘܟܦܘܪܘܬܐ ܦܝܫܬܐ ܗܘܐ ܡܘܚܪܘܒ݂ܬܐ ܒܥܠܕܒ݂ܒܘܗ̇ (ܒܕܫ̰ܡܢܘܗ̇) ܟܘܝ ܘܒܪܒܪ̈ܝܐ. ܐܝܢܐ ܚܕ ܡܢܕܝ ܪܒܐ ܥܘܕܝܝܐ (ܠܐ ܥܝܕܝܐ) ܝܠܗ ܠܫܡܥܝܐ، ܗ̇ܝ ܐܝܡܢ ܕܦܫܠܗ̇ ܗܕܟ݂ܐ ܡܘܚܪܒ݂ܬܐ ܘܬܠܚܬܐ، ܕܐܟ݂ܝ ܟܠܗ ܥܘܬܪܐ ܕܐܝܬ ܗܘܐ ܓܘܘܗ̇ ܠܐ ܦܫܠܗ ܣܠܝܒܐ ܘܠܐ ܙܐ ܡܚܘܙܕܓܐ، ܟܠܗ ܓܙܐ ܘܛܡܪ̈ܝܬܐ (ܚܙܝܢ̈ܐ) ܕܥܘܗܕܢ̈ܐ ܫܪܝܪ̈ܐ، ܐܝܢܝ ܕܩܐ ܕܘܪ̈ܐ ܦܝܫܐ ܝܗܘܘ ܟܘܦܫܐ ܘܩܘܪܦܣܐ (ܓ̰ܘܡܝܐ) ܠܓܘܘܗ̇ ܕܠܐ ܗܝܟ̰ ܚܘܙܕܓܐ ܦܫܠܗܘܢ ܛܘܫܝܐ ܬܚܘܬ ܩܘܚܢ̈ܐ ܕܥܦܪܐ.

ܡܒܘܥܐ:

ܬܫܥܝܬܐ ܕܒܝܬܢܗܪ̈ܝܢ

ܐܫܥܝܐ ܫܡܫܐ ܕܘܝܕ