ܡܢܬ݂ܐ ܕ5

ܐܝܢܐ ܡ̣ܢ ܩܕ݇ܡ ܢܦܠܬܐ ܕܢܝܢܘܐ ܒܐܝܕܐ ܕܒܥܠܕܒ݂ܒ݂ܐ (ܕܫ̰ܡܢ)، ܐܘܦ ܐܗܐ ܥܘܗܕܢܐ ܐܣܟܝܡܢܝܐ ܘܐܡܝܢܐ ܕܐܗܐ ܡܬܚܐ ܒܩܛܥܝܐ ܝܠܗ، ܒܘܬ ܐܗܐ ܐܝܟܼ ܕܡܒܝܘܢܐ ܝܠܗ̇ ܒܐܗܐ ܥܕܢܐ ܐ݇ܚܪ݇ܢܐ ܠܝܬ ܗܘܐ ܒܦܝܫܐ ܚܕ ܟܬܒ݂ܐ ܐܫܘܪܝܐ ܕܡܕܪܐ ܗܩܐ ܗܘܐ ܩܬܢ ܐܗܐ ܬܪܓ̰ܝܕܝܐ (ܓܕܫܐ) ܒܝܫܐ.

 ܣܬܪܐ ܕܫܘܠܛܢܐ ܐܕܝܐ ܡܐܝܟܼ ܠܗ̇ܘ ܓܒܐ ܡܕܪܐ ܫܢܘܝܐ ܝܠܗ ܠܒܒܐܝܠ، ܗ̇ܝܓܗ ܡܠܟ̈ܐ ܕܬܡܐ ܒܫܩܠܐ ܝܢܐ ܠܓܓ݂ܠܐ ܕܥܘܗܕܢ̈ܐ ܕܗܠ ܗ̇ܝ ܥܕܢܐ ܗܟ̰ ܠܐ ܝܗܘܐ ܦܝܫܐ ܬܒ݂ܝܪܐ، ܘܐܘܦ ܩܐ ܚܕ݇ܟܡܐ ܕܘܪ̈ܐ ܡ̣ܢ ܒܬ݇ܪ ܗܕܐ ܒܝܗܒ݂ܐ ܝܢܐ ܩܬܢ ܠܚܕܪܝܐ ܢܘܩܙ̈ܐ ܘܡܘܕܥܢܘܬ̈ܐ ܐܢܢܩܝ̈ܐ ܒܘܬ ܐܗܐ ܬܫܥܝܬܐ، ܘܡ̣ܢ ܒܬ݇ܪ ܕܐܢܹܐ ܐܘܦ ܥܘܗܕܢ̈ܐ ܕܒܒܐܝܠܝ̈ܐ ܒܚܬܡܐ ܝܢܐ، ܗܝܓܗ ܝܘܒܠ̈ܐ ܕܦܪ̈ܣܝܐ ܫܪܘܝܐ ܝܢܐ.

 ܐܢܹܐ ܥܘܗܕܢ̈ܐ ܚܕ݇ܟ̰ܐ ܥܕܢܐ ܡ̣ܢ ܒܬ݇ܪ ܗܕܐ ܒܢܦܠܐ ܝܢܐ ܒܐܝܕ̈ܐ ܕܟܬܒ݂̈ܐ ܝܘܢܝ̈ܐ، ܫܪܘܝܐ ܡ̣ܢ ܗܪܘܕܘܬܘܣ. ܡܐܟ݂ܐ ܠܗ̇ܘ ܓܒܐ ܪܐܙܐ ܕܚܡܝܬܐ ܕܥܘܗܕܢ̈ܐ ܕܬܫܥܝܬ̈ܐ ܐ݇ܚܪ݇ܢܹܐ ܗܟ̰ ܠܐ ܝܠܗ ܦܝܫܐ ܕܟ݂ܝܪܐ.

ܐܕܝܐ ܒܝܕܥܝܐ ܝܘܚ ܟ̰ܡ ܨܦܝܝ ܕܐܢܹܐ ܟܬܝܒ݂ܝܬ̈ܐ ܥܘܕܝܝ̈ܐ (ܫܢܝܙ̈ܐ) ܕܐܬܘܪ̈ܝܐ ܘܒܒܐܝܠܝ̈ܐ ܒܟܠܝܗܝ ܙܒ݂ܢ̈ܐ ܥܬܝܩ̈ܐ، ܗܟ̰ ܠܐ ܝܗܘܘ ܦܝܫܹܐ ܝܕܝܥܹܐ، ܘܐܘܦ ܡ̣ܢ ܒܬ݇ܪ ܗܕܐ ܗܠ ܝܘܡܐ ܕܦܝܫܐ ܝܗܘܘ ܡܘܫܟ̰ܚ̈ܐ ܩܪ̈ܝܐ ܘܡܦܘܫܩ̈ܐ ܒܕܘܪܐ ܕܬܫܥܣܪ.

ܡܒܘܥܐ:

ܬܫܥܝܬܐ ܕܒܝܬܢܗܪ̈ܝܢ

ܐܫܥܝܐ ܫܡܫܐ ܕܘܝܕ