ܡܢܬ݂ܐ 7

ܒܘܬ ܫܡܝܪܡ ܐܦܢ ܪܒܐ ܦܝܫܐ ܝܠܗ ܐ݇ܡܝܪܐ ܘܟܬܝܒ݂ܐ، ܐܝܢܐ ܠܝܬ ܦܘܫܟ݂ܐ[1] ܕܗ̇ܝ ܝܬܒ݂ܠܗ̇ ܥܠ ܟܘܪܣܝܐ ܕܡܠܟܘܬܐ ܕܚܕ ܐܘܚܕܢܐ ܪܒܐ ܪܘܝܚܐ، ܕܦܝܫܐ ܝܗܘܐ ܩܢܝܐ ܘܬܘܪܨܐ ܒܚܕ݇ܟܡܐ ܡܠܟ̈ܐ ܓܢ݇ܒܪ̈ܐ ܕܐܬܘܪ ܪܒܐ ܥܕܢܐ ܡ̣ܢ ܩܕ݇ܡ ܗܕܐ. ܣܪܓܘܢ ܬܓ݂ܠܬܦܠܐܣܪ ܘܟܠܝܗܝ ܡܠܟ̈ܐ ܐ݇ܚܪ̈ܢܐ ܕܡ̣ܢ ܒܬ݇ܪ ܡܢܝܗܝ ܦܝܫܐ ܝܗܘܘ ܡܘܢܫܝܐ ܒܦܪܨܘܦܐ، ܐܝܢܐ ܦܘܠܚܢܝܗܝ ܗܪ ܕܐ݇ܡܪܢ، ܒܦܝܫܐ ܝܗܘܘ ܓܘ ܡܬܥܡܪܢܝܬܐ ܒܚܕ݇ ܦܨܠܐ ܚܘܒ݂ܝܢܐ، ܗ̇ܝܓܗ ܡ̣ܢ ܓܘ ܕܐܢ̈ܐ ܙܟ݂ܘܝܬ̈ܐ[2] ܫܪܝܪ̈ܐ ܕܐܢܝ ܡܠܟ̈ܐ ܛܢܢ̈ܐ، ܩܘܡܐ ܕܗܘܐ ܦܠܝܛܐ ܐܗܐ ܪܥܝܢܐ ܕܒܘܬ ܚܕ ܡܫܠܛܢܐ ܡܬܠܝܐ ܕܗܘܝܐ ܫܡܝܪܡ، ܗ̇ܝ ܕܛܘܒܘܗ̇ ܝܢ ܓܕܘܗ̇[3] ܗܕܟ݂ܐ ܡܘܬ݇ܝܠܗ̇ ܕܫܡܘܗ̇ ܩܐ ܕܪ̈ܐ ܓܪܓ ܫܩܠ ܗܘܐ ܠܫܘܦܐ ܕܫܡܢ̈ܐ ܕܥܒ݂ܘܕ̈ܐ ܬܪ̈ܘܨܐ ܘܫܪܝܪ̈ܐ.

ܐܝܢܐ ܡܕܪܐ ܓܪܓ ܠܐ ܦܝܫܐ ܡܘܢܫܝܬܐ، ܐܝܬܠܗ ܕܓܘ ܕܘܢܝܐ ܠܝܬ ܗܘܝܬܐ ܚܕܐ ܡܬܠܬܐ ܕܠܐ ܗܘܐ ܠܗ̇ ܗܘܝܬܐ ܚܕܐ ܫܬܐܣܬܐ ܫܪܝܪܬܐ، ܗ.ܕ. ܟܠ ܡܬܠܐ ܕܦܝܫܐ ܝܠܗ ܐܡܝܪܐ ܓܘ ܡܬܥܡܪܢܝܬܐ ܐܝܬܠܗ ܚܕܐ ܒܢܝܬ ܘܫܬܐܣܬܐ ܕܥܠܘܗ̇ ܦܝܫܐ ܝܠܗ ܒܢܝܐ، ܡܥܢܝܘܗ̇ ܝܠܗ̇ ܐܢ ܠܐ ܗܘܝ ܗܘܘ ܗܘܝܐ ܗܕܟ݂ܐ ܡܠܟ̈ܐ ܓܢ݇ܒܪ̈ܐ ܡܫܠܛ̈ܐ[4] ܥܠ ܐܬܘܪ، ܗ̇ܝܓܗ ܐܘܦ ܠܐ ܗܘܝ ܗܘܘ ܗܕܟ݂ܐ ܡܬܠ̈ܐ ܡܕܡܪ̈ܢܐ[5] ܒܘܬ ܐܗܐ ܡܠܟܬܐ ܫܡܝܪܡ، ܗ̇ܝ ܕܐܘܦ ܦܝܫܬܐ ܝܠܗ̇ ܚܫܝܒ݂ܬܐ ܕܗܘܝܐ ܗܘܝܬܐ ܡܕܡܪܢܬܐ ܒܫܘܦܪܐ ܘܠܚܘܡܬܐ ܕܗܕܡ̈ܐ ܕܦܓ݂ܪܐ. ܚܒܪܐ ܡܫܡܗܐ ܕܟܐ ܦܐܫ ܡܘܦܠܚܐ : ܠܝܬ ܬܢܐ ܠܐ ܒܢܘܪܐ، ܚܕ݇ ܫܪܪܐ ܝܠܗ ܕܟܬܒ݂ܐ ܓܪܓ ܠܐ ܡܢܫܠܗ، ܘܗܕܟ݂ܐ ܫܪܝܪܐ ܝܠܗ ܕܬܫܥܝܬܐ ܕܐܬܘܪ ܒܓܢܘܗ̇ ܒܓܢܘܗ̇ ܒܝܗܒ݂ܐ ܝܠܗ̇ ܩܬܘܗ̇ ܚܕܐ ܣܗܕܘܬܐ ܠܚܘܕܝܬܐ.

[1] ܦܘܫܟ݂ܐ: ܫܟܘܬܐ

[2] ܙܟ݂ܘܝܬ̈ܐ: ܩܪ̈ܡܝܬ̈ܐ، ܓ݂ܠܝܒܘܝܬ̈ܐ

[3] ܓܕܘܗ̇: ܐܩܒܠܘܗ̇

[4] ܡܫܠܛ̈ܐ: ܚܟܝܡ̈ܐ ܝܢ ܡܗܘܟܡ̈ܐ

[5] ܡܕܡܪ̈ܢܐ: ܡܥܓ̣ܒܢ̈ܐ، ܬܡܝܗ̈ܐ