ܡܛܠ ܣܦܪܝܘܬܐ ܚܝܬܐ
ܩܐ ܟܠ ܟܬܒܼܐ ܘܟܬܒܼܬܐ ܕܒܢ̈ܝ ܐܘܡܬܢ ܫܪܝܪ̈ܐ. ܐܗܐ ܣܦܪܙܒ݂ܢܐ ܦܬܝܚܐ ܝܠܗ ܩܐ ܩܢܝܘܟܼܘܢ ܫܦܝܪ̈ܐ ܡܛܠ ܟܠ ܐܘܡܬܐ ܦܝܫܬܐ ܝܠܗ̇ ܝܕܥܬܐ ܒܝܕ ܣܦܪܝܘܬܐ ܕܡܘܩܪܘܒܼܬܐ ܝܠܗ̇ ܘܕܡܩܪܘܒܼܐ ܝܠܗ̇. ܡܪܘܚܬܐ ܘܡܓܡܪܬܐ ܕܣܦܪܝܘܬܐ ܕܐܘܡܬܢ ܒܠܫܢܢ ܝܠܝܗܝ ܕܝܠܝܬ̈ܐ ܕܚܝܘܬܐ ܘܡܐܙܠܬܐ ܕܐܝܬܘܬܐ ܕܐܘܡܬܢ ܓܘ ܕܐܗܐ ܒܪܝܬܐ. ܡܘܚܒܝ ܩܪܝܢܐ ܘܟܬܒܼܐ ܒܠܫܢܢ ܚܠܝܐ ܠܐ ܡܟܠܬ ܠܩܢܝܘܟ̇ ܒܠܫܢܘܟ̇ ܡܛܠ ܐܚܟ̰ܝ ܒܐܢܝ ܡܠܠ̈ܐ ܘܗܡܙܡܢ̈ܐ ܕܠܫܢܐ ܕܝܡܐ ܟܐ ܪܓܼܫܚ ܛܥܡܐ ܕܚܝܘܬܐ ܘܡܘܣܝܩܝ ܕܩܝܢܬܐ ܕܟܝܢܐ. ܠܫܢܘܟ݂ܘܢ ܝܠܗ ܪܡܙܐ ܕܡܕܝܢܝܘܬܐ ܘܡܪܕܘܬܐ ܘܕܠܐ ܕܐܗܐ ܡܪܕܘܬܐ ܒܕ ܟܠܝܐ ܡܐܙܠܬܐ ܕܚܝܘܬܐ ܘܒܪܝܬܐ ܚܕܬܐ ܕܐܘܡܬܢ. ܠܫܢܐ ܝܠܗ ܗ̇ܘ ܐܣܛܘܟܼܣܐ ܒܘܫ ܐܢܢܩܝܐ ܘܐܠܨܝܐ ܩܐ ܐܡܝܢܘܬܐ ܕܫܘܘܫܛܐ ܘܡܬܛܘܪܢܘܬܐ ܕܚܕܐ ܐܘܡܬܐ، ܗܕܟܼܐ ܐܠܨܝܬܐ ܕܟܠ ܚܕ ܩܢܝܐ ܐܘܡܬܢܝܐ ܘܕܐܝܬܠܗ ܣܒܼܪܐ ܒܩܘܝܡܐ ܕܐܗܐ ܐܘܡܬܐ ܕܦܠܚ ܒܟܠ ܩܫܝܘܬܐ ܡܛܠ ܡܪܡܬܐ ܘܡܬܛܘܪܢܘܬܐ ܕܣܦܪܝܘܬܢ ܠܫܘܝܐ ܕܣܦܪܝܘܬܐ ܬܒܼܝܠܝܬܐ ܘܐܗܐ ܠܐ ܐܬܐ ܠܐܝܬܘܬܐ ܕܠܐ ܦܠܚܢܐ ܩܫܝܐ ܘܟܫܝܪܐ ܡܛܠ ܚܡܝܬܐ ܘܡܬܛܘܪܢܘܬܐ ܕܠܫܢܢ ܘܣܦܪܝܘܬܢ.
ܩܪ̈ܝܢܐ ܡܘܚܒ̈ܐ ܡܪܕܘܬܐ ܕܚܕ ܥܡܐ ܟܠܝܬܐ ܝܠܗ̇ ܥܠ ܚܝܠܐ ܕܦܪܣܬܐ ܕܣܦܪܝܘܬܐ ܒܠܫܢܐ ܝܡܝܐ ܩܐ ܕܐܗܐ ܐܢܢܩܝܬܐ ܝܠܗ̇ ܟܠ ܚܕ ܒܪܘܢܐ ܘܒܪܬܐ، ܥܠܝܡܐ ܘܥܠܝܡܬܐ ܘܟܠ ܒܪܢܫܐ ܐܬܘܪܝܐ ܡܗܘܡܢܐ ܒܚܝܘܬܐ ܐ݇ܢܫܝܬܐ ܘܫܘܘܫܛܐ ܘܡܬܛܘܪܢܘܬܐ ܕܐܘܡܬܢ ܕܡܚܦܛ ܠܝܦܬܐ ܕܠܫܢܐ ܝܡܝܐ، ܘܠܐ ܝܠܗ̇ ܥܣܩܐ ܠܝܗܒ݂ܠܬܐ ܕܚܕ݇ܟܡܐ ܕܩܝܩ̈ܐ ܓܘ ܫܒ݂ܘܥܐ ܩܐ ܝܠܦܬܐ، ܩܪܝܬܐ ܝܢ ܟܬܒ݂ܬܐ ܕܪ̈ܢܝܐ ܓܘ ܣܦܪܙܒ݂ܢ̈ܢ ܘܡܓܼܠܝܬ̈ܢ ܒܠܫܢܢ ܝܡܝܐ.
ܥܡ ܚܘܒܐ ܘܐܝܩܪܐ
ܦܘܠܘܣ ܕܢܚܐ