ܡܛܠ ܡܢܬܝܬܐ ܕܦܘܠܚܢܢ ܐܘܡܬܢܝܐ
ܟܠ ܐܘܡܬܢܝܐ ܫܪܝܪܐ ܐܢ ܕܝܠܗ ܒܦܠܚܐ ܓܘ ܫܘܬܐܣ̈ܐ ܦܘܠܝܛܝܩܝ̈ܐ، ܡܪ̈ܕܘܬܢܝܐ ܐܘ ܥܕܬܢܝ̈ܐ ܟܐ ܦܪܡ ܘܣܟܠ ܕܠܐ ܚܘܝܕܐ ܓܡܝܪܐ ܒܐܘܪܚܐ ܕܦܠܚܢܐ ܠܐ ܡܨܚ ܗܝܟ̰ ܓܗܐ ܡܛܚ ܠܢܝܫܢ ܐܘܡܬܢܝܐ ܘܠܐ ܠܡܪܘܡܐ ܠܫܘܐܠܢ ܐܘ ܨܒܼܘܬܢ ܐܘܡܬܢܝܬܐ ܕܡܨܚ ܠܫܩܠܐ ܙܕܩ̈ܢ ܢܡܘܣܝ̈ܐ ܒܐܪܥܢ ܩܕܝܫܬܐ ܒܝܬ݂ܢܗܪ̈ܝܢ.
ܓܘ ܕܐܢ̈ܐ ܢܩܝܦܘܬ̈ܐ ܘܐܝܟܢܘܬ̈ܐ ܕܩܐܡ ܒܫ ܐܠܨܝܬܐ ܝܠܗ̇ ܠܐܗܐ ܚܘܝܕܐ. ܘܐܝܡܢ ܕܒܐܡܪܐ ܝܘܢ ܚܘܝܕܐ ܣܘܟܠܝ ܝܠܗ ܚܘܝܕܐ ܠܐܘܪܚܐ ܕܦܠܚܢܐ ܡܛܠ ܢܝܫܢ ܩܢܛܪܘܢܝܐ ܘܐܗܐ ܚܘܝܕܐ ܕܦܠܚܢܐ ܡܨܢ ܩܢܛܪܢܢܗ ܓܘ ܬܪ̈ܝ ܢܘܩܙ̈ܐ ܕܒܐܬܝܐ ܝܠܝܗܝ:
- ܩܪܝܬܐ ܫܪܝܪܬܐ ܠܡܐܙܠܬܐ ܕܥܡܢ ܒܕܥܒ݂ܪ ܘܒܩܐܡ ܩܪܝܚܬܐ ܝܠܗ̇ ܘܨܦܝܬܐ ܕܐܓܼܘܢܢ ܘܚܘܦܛܢ ܠܐ ܝܠܝܗܝ ܗܘܝ̈ܐ ܒܫܘܝܐ ܕܡܫܬܐܠܢܘܬܐ ܕܙܒ݂ܢܐ ܡܛܠ ܠܐ ܗܘܚ ܡܨܝ̈ܐ ܗܝܟ̰ ܓܗܐ ܠܐ ܒܕܥܒ݂ܪ ܘܠܐ ܒܩܐܡ ܠܡܪܝܙܬܐ ܐܘ ܡܛܟܣܬܐ ܕܫܘܬܐܣ̈ܢ ܐܢ ܕܝܠܝܗܝ ܟܢܘܫܝܝ̈ܐ ܐܘ ܦܘܠܝܛܝܩܝ̈ܐ ܥܠ ܐܣ̈ܐ ܝܘܠܦܢܝ̈ܐ ܕܡܨܝ ܠܟܦܘܫ̈ܐ ܘܚܠܘܢܐ ܠܪ̈ܢܝܐ ܘܐܘܪ̈ܚܬܐ ܕܦܠܚܢܐ ܓܡܝܪܐ ܡܛܠ ܡܬܛܘܪܢܘܬܐ ܕܣܘܟܠܐ ܥܡܝܐ ܘܦܫܪܬܐ ܕܫܘܡܗ̈ܐ ܕܘܟܬܢܝ̈ܐ ܬܫܥܝܬܢܝ̈ܐ، ܬܘܕܝܬܢܝ̈ܐ ܘܫܒ݂ܛܝ̈ܐ ܓܘ ܣܘܟܠܐ ܕܐܬ݂ܪܐ ܕܒܝܬ݂ܢܗܪ̈ܝܢ، ܐܝܢܐ ܒܗܦܟܐ ܕܐܗܐ ܐܡܝܢܐܝܬ ܗܘܝܐ ܝܠܝܗܝ ܫܘܬܐܣ̈ܢ ܡܥܕܪ̈ܢܐ ܩܐ ܡܦܠܓܼܢ̈ܐ ܘܟ̰ܠܦܢ̈ܐ ܕܐܘܡܬܢ ܕܝܘܡܐ ܩܐ ܝܘܡܐ ܒܫ ܬܘܣܘܦܐ ܝܠܝܗܝ.
ܥܠܬܐ ܕܦܫܡܬܐ ܝܠܗ ܕܐܡܪܢ ܥܠܬ݂̈ܐ ܕܐܗܐ ܡܪܥܐ ܝܠܗ
ܐ. ܕܐܚܢܢ ܠܐ ܝܘܚ ܡܨܝܐ ܠܡܩܝܘܡ̈ܐ ܫܘܬܐܣ̈ܐ ܒܢܝ̈ܐ ܥܠ ܬܐܘܪ̈ܝܐ ܘܪ̈ܢܝܐ ܝܘܠܦܢܝ̈ܐ ܡܘܕܒ݂ܩ̈ܐ ܥܡ ܕܘܟܐ ܘܙܒ݂ܢܐ ܘܢܩܝܩܘܬ݂̈ܐ ܣܝܡܢܝ̈ܐ.
ܒ. ܠܝܬ݂ܝܘܬ݂ܐ ܕܚܘܪ̈ܙܐ ܡܪ̈ܕܘܬܢܝܐ ܕܬܘܠܡܕܼܐ ܐܘܡܬ݂ܢܝܐ ܐܬ݂ܪܝܐ ܓܘ ܫܘܬܐܣ̈ܢ ܒܩܐܡ ܗ.ܕ ܟܢܘܫܝܝ̈ܐ، ܥܕܬܢܝ̈ܐ ܘܦܘܠܝܛܝܩܝ̈ܐ.
ܓ. ܫܘܬܐܣ̈ܢ ܠܐ ܝܠܝܗܝ ܗܘܝܐ ܡܥܕܪ̈ܢܐ ܩܐ ܚܠܢܬܐ ܕܟܢܘܫܝܬ݂̈ܐ ܡܪ̈ܕܘܬܢܝܐ، ܐܡܢܝ̈ܐ ܘܟܢܘܫܝܝ̈ܐ ܠܨܘܒܐ ܕܨܒ݂ܘܬ݂ܢ ܐܘܡܬܢܝܬܐ ܐܬ݂ܪܝܬܐ.
ܕ. ܝܘܕܥܐ ܓܒܝܐ ܠܐ ܝܠܗ ܗܦܟ݂ܐ ܘܡܪܘܡܐ ܣܢܝܩܘܬ݂̈ܐ ܕܥܡܢ ܘܒܥܘܝܬ̈ܝܗܝ ܝܘܡܝ̈ܐ ܘܕܥܬܝܕܝ̈ܐ ܘܐܣܪܝܠܝܗܝ ܒܐܝܬܘܬܢ ܐܘܡܬܢܝܬܐ ܐܬ݂ܪܝܬܐ.
ܗ. ܝܘܕܥܐ ܓܒܝܐ ܠܐ ܝܠܗ ܚܘܪܪܐ ܡ̣ܢ ܬܚܡܢܬܐ ܥܬܝܩܬܐ ܕܡܨܐ ܝܗܒ݂ܠ ܣܬܘܪܝܐ ܠܦܘܕ̈ܐ ܓܘ ܛܘܟܣܐ ܘܡܣܬܪܘܢܐ ܠܪܢܝܐ ܘܐܝܕܝܘܠܘܓ̰ܝܐ ܕܓܒܐ ܕܝܗܒ݂ܐ ܬܫܡܫܬܐ ܩܐ ܥܡܢ ܘܙܕܩ̈ܗ ܢܡܘܣܝ̈ܐ ܒܐܬ݂ܪܢ.
- ܩܪܝܬܐ ܠܚܕ ܫܘܚܠܦܐ ܓܘ ܟܠܝܗܝ ܫܘܬܐܣ̈ܢ ܦܘܠܝܛܝܩܝ̈ܐ، ܟܢܘܫܝܝ̈ܐ، ܥܕܬܢܝ̈ܐ ܘܐܩܢܘܡܝܝ̈ܐ ܒܢܝ̈ܐ ܥܠ ܐܣ̈ܐ ܕܛܘܟܣܐ ܝܘܠܦܢܝܐ ܕܡܕܒܼܩܝ ܥܡ ܡܫܩܠܐ ܕܝܡܘܩܪܛܝܐ ܕܩܐܡ.
ܒܐܗܐ ܦܨܠܐ ܒܕ ܦܪܩܚ ܡ̣ܢ ܒܪܝܬܐ ܘܦܪܝܬܐ ܕܫܘܬܐܣ̈ܐ ܓܘ ܒܢ̈ܝ ܐܘܡܬܢ ܕܐܢܝ ܟܐ ܒܪܝ ܒܣܘܪܗܒ݂ܐ ܘܟܐ ܡܝܬـܝ ܒܬܪ ܚܕ ܙܒ݂ܢܐ ܟܪܝܐ.
ܡܛܠ ܦܪܡܝܬܐ ܘܡܬܣܟܠܢܘܬܐ ܠܐܗܐ ܩܪܝܬܐ ܐܠܨܝܬܐ ܝܠܗ̇ ܕܝܘܕܥܐ ܓܒܝܐ ܗܘܐ ܫܪܝܐ ܕܝܗܒ݂ܠ ܡܘܕܥܢܘܬܐ ܡܠܝܢܬܐ ܒܢܝܬܐ ܥܠ ܫܪܪ̈ܐ ܝܘܠܦܢܝ̈ܐ ܘܦܪܣܬܝܗܝ ܒܝܢܝ ܟܠܝܗܝ ܒܢܝ̈ ܐܘܡܬܢ ܐܢ ܕܝܠܝܗܝ ܓܘ ܣܕܪ̈ܐ ܕܓܒ̈ܐ ܐܘ ܓܘ ܣܕܪ̈ܐ ܕܫܪ̈ܝܐ.
ܒܕܼܩܬܐ ܕܡܘܕܥܢܘܬܐ ܬܪܝܨܬܐ ܥܠ ܣܘܟܝ̈ܐ ܘܒܥܘܝܬ̈ܐ ܕܐܘܡܬܢ ܝܠܝܗܝ ܐܢܝ ܘܠܝܬ̈ܐ ܒܫ ܐܣܝ̈ܐ ܕܚܕ ܫܘܬܐܣܐ ܕܒܦܠܚܐ ܝܠܗ ܩܐ ܪܘܚܢܐ ܘܡܢܬܝܬܐ ܕܚܕ ܥܡܐ.
ܘܠܝܬܐ ܕܚܕ ܫܘܬܐܣܐ ܦܘܠܛܝܩܝܐ ܝܠܗ̇ ܡܣܬܪܢܬܐ ܒܟܠ ܐܘܪܚܐ ܡܬܡܨܢܬܐ ܠܢܝܫ̈ܐ ܩܕܝܫ̈ܐ ܕܐܘܡܬܢ.
ܣܘܟܠܐ ܕܫܘܬܐܣܐ ܐܘܡܬܢܝܐ ܝܠܗ ܗ̇ܘ ܛܘܟܣܐ ܕܒܫܪܪܐ ܒܡܨܝܐ ܝܠܗ ܒܗܦܟ݂ܐ ܠܣܢܝܩܘܬ̈ܐ ܕܥܡܐ، ܗ̇ܘ ܕܒܡܨܝܐ ܝܠܗ ܠܒܘܠܐ ܠܨܒ݂ܘܬܐ ܕܥܡܐ ܠܩܕܡܐ، ܗ̇ܘ ܕܒܡܨܝܐ ܝܠܗ ܚܡܘܝܐ ܠܐܝܬܘܬܐ ܕܥܡܐ ܥܠ ܐܪܥܗ، ܗ̇ܘ ܕܒܐܣܪܐ ܝܠܗ ܠܟܠܝܗܝ ܒܢ̈ܝ ܐܘܡܬܢ ܒܓܠܘܬܐ ܒܚܕ ܐܣܘܪܐ ܐܘܡܬܢܝܐ ܚܠܝܨܐ ܠܢܝܫܐ ܕܥܡܢ ܩܕܝܫܐ ܓܘ ܒܝܬܢܪ̈ܝܢ.
ܩܐ ܕܡܨܐ ܐܗܐ ܫܘܬܐܣܐ ܫܪܪ ܠܐܢ̈ܐ ܢܝܫ̈ܐ ܥܡܝ̈ܐ ܐܠܝܨܐ ܝܠܗ ܕܗܘܐ ܫܡܥܢܐ، ܡܨܝܬܢܐ ܠܟܠ ܩܠܐ ܙܥܘܪܐ ܘܓܘܪܐ ܡ̣ܢ ܒܢ̈ܝ ܐܘܡܬܢ، ܡܬܩܒܠܢܐ ܠܟܠ ܩܒ݂ܠܬܐ ܡ̣ܢ ܟܠ ܗܕܡܐ ܕܒܢ̈ܝ ܐܘܡܬܢ ܐܢ ܕܝܠܗ ܓܒܝܐ ܐܘ ܫܪܝܐ، ܡܛܠ ܐܚܟ̰ܝ ܒܐܗܐ ܐܘܪܚܐ ܡܨܐ ܚܕ ܫܘܬܐܣܐ ܬܫܡܫ ܠܥܡܗ ܘܗܘܐ ܦܥܘܠܐ ܓܘ ܡܐܙܠܬܐ ܕܡܬܛܘܪܢܘܬܐ ܕܟܢܘܫܝܐ ܘܫܘܘܫܛܐ ܡܕܝܢܝܐ.
ܒܫܘܠܡܐ ܡܨܢ ܐܡܪܢ ܐܚܟ̰ܝ ܒܝܕ ܚܘܝܕܢ ܓܡܝܪܐ ܘܦܠܚܢܐ ܕܝܡܘܩܪܛܝܐ ܬܪܝܨܐ ܡܨܚ ܗܘܚ ܚܐܪܐ ܘܡܪܐ ܠܝܪܬܘܬܢ ܐܘܡܬܢܝܬܐ ܕܦܝܫܬܐ ܝܠܗ̇ ܬܚܘܬ ܐܝܕ̈ܐ ܕܢܘܟܼܪ̈ܝܐ، ܘܐܗܐ ܚܘܝܕܐ ܠܐ ܐܬܐ ܠܐܝܬܘܬܐ ܐܢ ܠܐ ܡܨܚ ܠܫܚܠܘܦܐ ܠܛܟ݂ܣܐ ܕܚܝܘܬܢ ܘܫܒ݂ܝܠ̈ܐ ܘܕܘܒܪ̈ܐ ܕܦܠܚܢܢ ܕܡܕܒ݂ܩܝ ܥܡ ܡܐܙܠܬܐ ܘܗܢܝܢ̈ܐ ܡܫܘܬܦ̈ܐ ܥܡ ܐܡܘܬ̈ܐ ܫܒ݂ܒ݂̈ܐ ܐܘ ܐܡܘܬ̈ܐ ܪܚܩܐ ܡܢܢ ܕܗܘܐ ܗܢܝܢܐ ܕܥܡܢ ܐ݇ܣܝܪܐ ܒܗܢܝܢܐ ܕܟܠܝܗܝ ܥܡܡ̈ܐ ܓܘ ܕܐܗܐ ܬܹܒ݂ܹܝܠ.